Një tarifë shtesë prej 34% për mallrat amerikane është shpallur nga Kina në përgjigje të luftës tregtare të shpallur nga Donald Trump, duke treguar kështu se nuk ka ndërmend të tërhiqet.
Masa do të hyjë në fuqi nga 10 prilli. Sipas Ministrisë së Financave të Kinës, tarifat e SHBA për mallrat kineze janë “në kundërshtim me rregullat e tregtisë ndërkombëtare”.
“Kjo praktikë e SHBA është në kundërshtim me rregullat e tregtisë ndërkombëtare, minon seriozisht të drejtat dhe interesat legjitime të Kinës dhe është një praktikë tipike e njëanshme e frikësimit,” tha ministria kineze në një deklaratë. Presidenti i SHBA Donald Trump njoftoi tarifa 54% ndaj Pekinit, të cilat përfshijnë tarifa të mëparshme tashmë të vendosura, duke e bërë Kinën një nga vendet më të goditura në listën tarifore të SHBA.
Menjëherë pas njoftimit të hakmarrjes kineze, tregjet financiare të Europës regjistruan një rënie të re. Në Londër, indeksi FTSE 100 ka humbur tani 313 pikë, ose 3.7%, që nga hapja e tregtisë në 8,173 pikë, duke shënuar rënien e tij më të madhe njëditore që nga marsi 2023. Ndërkohë, indeksi Stoxx 600 i kompanive më të mëdha të Evropës tani është ulur 4.4% dhe DAX i Gjermanisë është 5%.
Një rënie e madhe pritet edhe në Nju Jork, ku tregtimi do të nisë në më pak se tre orë. Kontratat e së ardhmes për mesataren industriale të Dow Jones janë ulur me 950 pikë, duke treguar një rënie prej 2.4%.
Një kolaps shihet edhe në çmimin e naftës, pasi nafta bruto Brent sot ra me 6.6% në 65.50 dollarë për fuçi, niveli më i ulët që nga gushti 2021.
Në të njëjtën kohë, Ministria e Tregtisë e Kinës njoftoi se po shton 11 kompani amerikane në listën e “entiteteve të pabesueshme”. Në fakt, duke vepruar kështu, i ndalon ata të bëjnë biznes në Kinë ose me kompani kineze.
Ministria vendosi gjithashtu kufizime të rrepta për eksportet e shtatë elementëve të tokës së rrallë që minohen pothuajse ekskluzivisht në Kinë dhe përdoren në çdo gjë, nga makinat elektrike te bombat inteligjente.
Departamenti i Tregtisë njoftoi gjithashtu se ka nisur dy hetime tregtare për eksportet amerikane të pajisjeve të imazhit mjekësor, të cilat janë ndër të paktat kategori produktesh prodhuese në të cilat Shtetet e Bashkuara mbeten konkurruese ndërkombëtare.
Administrata e Përgjithshme e Doganave e Kinës tha se do të ndalonte importet e pulave nga pesë prej eksportuesve më të mëdhenj bujqësor të Amerikës.
Asnjë përjashtim
Tarifat e reja të Kinës do të godasin më pak mallra sesa tarifat e Presidentit Trump, sepse Kina shet shumë më tepër sesa blen. Vitin e kaluar, Pekini bleu gjysmëpërçues amerikanë, lëndë djegëse fosile, produkte bujqësore dhe mallra të tjera me vlerë 147.8 miliardë dollarë. Ajo gjithashtu shiti 426.9 miliardë dollarë telefona inteligjentë, mobilje, lodra dhe shumë produkte të tjera.
Megjithatë, ndryshe nga tarifat e Donald Trump që përjashtojnë kategori të mëdha importesh si gjysmëpërçuesit dhe farmaceutikët, tarifat kineze nuk kanë përjashtime.
