Televizioni kombëtar kinez Mango Tv është duke u përballur me një valë të madhe pakënaqësish dhe kritikash online pas censurës së bërë ndaj fjalimit të aktorit Rami Malek, fitues i çmimit ‘Oscar’ si aktori më i mirë mashkull, për filmin “Bohemian Rhapsody”.
Gjatë fjalimit të tij Malek, u shpreh për produksionin, si realizimi i një filmi për një homoseksual, një emigrant, i cili e jetoi jetën e tij duke mos qenë vetvetja.
Por përkthimin e fjalës ‘homoseksual’ televizioni kinez e përktheu në “grup special”. Për këtë arsye në rrjete kanë shpërthyer kritikat për këtë censurë duke publikuar me qindra foto nga fjala e ndryshuar.
Nuk është hera e parë që ky televizion censuron referenca që kanë të bëjnë me homoseksualitetin. Kujtojmë se po i njëjti transmetues, censuroi të gjitha referencat në lidhje me LGBT në Eurovizion.
Në vitin 2018 EBU nuk e lejoi këtë televizion të transmetonte festivalin e Eurovizion për shkak të censurës që i bënin elementëve të LGBT-së, duke arritur të sfumonin edhe flamujt e tyre me ngjyrat e ylberit.
Sipas “EBU” ky televizion nuk ishte në linjë me traditën e celebrimit të ndryshueshmërisë nëpërmjet muzikës.
Kujtojmë se edhe performanca e këngëtarit shqiptar Eugent Bushpepa është censuar për shkak të tatuazheve të tij dhe të tatuazheve të personave të tjerë që e shoqëronin në Eurovizion vitin që lamë pas. Ndërkohë ‘Mango Tv’ nuk i është përgjigjur këtyre kritikave online./Xh.K/Opinion.al/
