Organizata Botërore e Shëndetësisë njoftoi se një grua kineze është bërë personi i parë që ka vdekur nga një lloj gripi i shpendëve që është i rrallë tek njerëzit, por virusi nuk duket se përhapet mes njerëzve..
56-vjeçarja nga provinca jugore e Guangdong ishte personi i tretë që dihet se ishte infektuar me nënvariantin H3N8 të gripit të shpendëve, tha OBSH në një deklaratë.
Qendra Provinciale Guangdong për Kontrollin dhe Parandalimin e Sëmundjeve raportoi infeksionin e tretë në fund të muajit të kaluar, por nuk dha detaje për vdekjen e gruas. Pacientja u shtrua në spital për pneumoni të rëndë , thotë OBSH, ku më pas u zbulua se ishte e infektuar me gripin e shpendëve.
Mostrat e mbledhura nga një treg i lagësht i vizituar nga gruaja para se të sëmurej ishin pozitive për gripin A(H3), tha OBSH, duke sugjeruar se ky mund të ketë qenë burimi i infeksionit.
Megjithëse i rrallë te njerëzit, H3N8 është i zakonshëm te zogjtë, tek të cilët shkakton pak ose aspak shenja sëmundjeje. Ka infektuar edhe gjitarë të tjerë. Nuk u gjetën raste të tjera midis kontakteve të ngushta të gruas së infektuar, tha OBSH.
“Në bazë të informacionit të disponueshëm, duket se ky virus nuk ka aftësinë të përhapet lehtësisht nga personi në person dhe për këtë arsye rreziku i përhapjes së tij midis njerëzve në nivel kombëtar, rajonal dhe ndërkombëtar konsiderohet i ulët”, OBSH tha në deklaratë.
