Zëvendësndihmësja Sekretarje Kryesore e Shtetit, Yuri Kim, ka pritur këtë të mërkurë, kryetaren e Kuvendit, Lindita Nikolla.
Ky lajm është bërë i ditur nga vetë Nikolla, përmes një postimi në rrjete sociale, ku thotë se kanë diskutuar mbi zhvillimet politike në Shqipëri dhe një sërë çështjesh të tjera me mjaft rëndësi.
Një nga çështjet e diskutuara sipas Nikollës, ka qenë edhe situata mes Kosovës dhe Serbisë, për të cilën thekson se nevojitet ndërhyrja e komunitetit euro-atlantik për depërshkallëzimin e situatës, dialogun Kosovë-Serbi si e vetmja rrugë për garantimin e paqes.
“Me Zëvendësndihmës Sekretaren Kryesore të Shtetit, miken tonë, znj. Yuri Kim, biseduam mbi zhvillimet politike në Shqipëri, avancimin e reformave dhe bashkëpunimin për sigurinë kibernetike. Lidershipi i fortë i Shqipërisë në KS, kontributi pas zgjedhjes në 10 tetor në Këshillin e të Drejtave të Njeriut dhe vijimi i angazhimit në luftën kundër terrorizmit rrisin ndikimin e partneritetit strategjik në përballimin e sfidave të përbashkëta.
Nevoja e depërshkallëzimit të situatës në Veri të e bën emergjente ndërhyrjen e komunitetit euro-atlantik për dialogun Kosovë-Sërbi si e vetmja rrugë për garantimin e paqes. Diskutuam mbi kontributin e Kuvendit për garantimin e legjitimitetit demokratik dhe karakterit gjithëpërfshirës të procesit të integrimit.
Faleminderit, e dashur Yuri, për bashkëpunimin Tuaj dhe vijimin e kontributit për zhvillimin dhe demokratizimin e Shqipërisë”, shkruan Nikolla./Opinion.al
