Para se të përfundojë misionin diplomatik në Shqipëri, ambasadorja e SHBA-ve, Yuri Kim po mban një konferencë për mediat.
Kim gjatë fjalës së saj theksoi se reforma në drejtësi i ka dhënë mundësi vendit që të hapte negociatat për anëtarësim në BE, teksa ka shtuar se kjo reformë po jep rezultate.
Më tej Kim dha një mesazh që Shqipëria të mos ndalojë, por të ecë përpara deri në arritjen e qëllimit të uljes në tryezën evropiane.
“Gjatë 3 vitesh e gjysmë kam pasur privilegjin që të isha si një ambasadore e re për të forcuar lidhjen e veçantë mes Shqipërisë dhe SHBA. Unë jam shumë mirënjohëse që kam pasur këtë mundësi dhe të njoh Shqipërinë, të vizitoj të 61 bashkitë e saj dhe të përpiqem të jap kontributin tim në demokraci dhe biznes.
Shqipëria ka ndërmarrë reforma të vështira, sidomos në drejtësi që i dha vendit tuaj mundësinë që të hapte negociatat për anëtarësim në BE. E kam thënë shpesh se reforma në drejtësi po jep rezultate. Mos ndaloni, vazhdoni të ecni përpara dhe hap pas hap derisa të arrini qëllimin tuaj. SHBA do të jenë me ju në çdo hap të rrugës. Ne nuk do të lëkundemi kurrë në aspiratat e popullit shqiptar për të zënë vendin që i takon në tryezën evropiane.
Bashkëpunimi ynë në fushën e mbrojtjes ka arritur nivele të reja. Në vitin 2021, Shqipëria ishte organizatore e Defender 2021, stërvitja më e madhe ushtarake që nuk ishte mbajtur kurrë më parë. Shqipëria ndërtoi mbi suksesin e asaj veprimtarie për të mirëpritur “Defender 2023”. Aktivitetet amerikane-shqiptare në fushën e mbrojtjes janë 3-fishuar”-tha Kim.
