Ambasadorja e SHBA, Yuri Kim, ka deklaruar se është takuar me anëtarët e Këshillit të Lartë të Prokurorisë për të nënvizuar rëndësinë e zgjedhjes së kreut të ri të SPAK-ut.
Në një status në “Twitter” ajo thotë se procesi i zgjedhjes së kreut të SPAK nuk duhet të ndikohet nga persona që kanë interes për të kufizuar ose manipuluar hetime.
Teksa thotë se Reforma në drejtësi nuk është vetëm një kërkesë për anëtarësimin në BE por është edhe kërkesa e popullit shqiptar, Kim thekson se SHBA do të monitorojë nga afër procesin.
“Javën e fundit jemi takuar me çdo anëtar të Këshillit të Lartë të Prokurorisë (KLP) për të nënvizuar rëndësinë e zgjedhjes së kreut të ri të SPAK-ut, i cili – pa frikë e favore – do të intensifikojë luftën kundër korrupsionit dhe krimit të organizuar.
Procesi i përzgjedhjes nuk duhet të ndikohet nga ata që kanë interes për të kufizuar ose manipuluar hetimet. Ky është thelbi i reformës në drejtësi: drejtësia duhet të jetë e verbër ndaj pushtetit, prokurorët dhe gjyqtarët duhet të jenë të gjithë të barabartë përpara ligjit, institucionet duhet të jenë të pavarura.
Reforma në drejtësi nuk është vetëm një kërkesë për anëtarësimin në BE; është kërkesa e drejtë e popullit shqiptar. SHBA do të qëndrojë gjithmonë me popullin e Shqipërisë. Ne do të vazhdojmë të mbështesim me vendosmëri zbatimin e reformës në drejtësi. Kjo nuk do të ndryshojë.
Ne do të monitorojmë nga afër procesin e përzgjedhjes së SPAK-ut për të siguruar që reforma në drejtësi të ecë përpara”-shkruan Kim.
