Udhëheqësi i Koresë së Veriut, Kim Jong Un tha se ai beson se vendi i tij nuk do të ketë më nevojë për të luftuar luftëra sepse arsenali i tij bërthamor garanton sigurinë e tij, raportojnë mediat shtetërore të Koresë së Veriut.
“Me parandaluesin tonë të besueshëm dhe efektiv të vetë-mbrojtjes bërthamore, nuk do të ketë më luftë në këtë tokë dhe siguria dhe e ardhmja e vendit tonë do të sigurohen përgjithmonë,” tha Kim në një fjalim, raporton Agjencia Qendrore e Lajmeve e Koresë së Veriut (KCNA).
Duke folur me një grup veteranësh në 67 vjetorin e armëpushimit që përfundoi Luftën Koreane, Kim tha se armët bërthamore do të lejonin Korenë e Veriut të mbrohej vetë “kundër çdo presioni dhe kërcënimeve ushtarake të imperialistëve dhe forcave armiqësore”.
Koreja e Veriut ka vite që pretendon se po ndërmerr projektin e saj të armëve bërthamore thjeshtë për qëllime mbrojtëse për të penguar përpjekjet për pushtim ose ndryshim të regjimit. Por disa ekspertë thonë se armët bërthamore do të forcojnë Pyongyangun, duke lejuar që regjimi i Kim të miratojë politika më armiqësore dhe të ashpra teksa ndalon kundërshtarët të reagojnë ndaj agresionit të nivelit më të ulët.
Pavarësisht nga arsyeja pse Koreja e Veriut po ndjek progrmin e armëve bërthamore dhe raketat balistike të nevojshme për t’i lëshuar ato, komentet e Kim të hënën janë një kujtesë e rëndësishme se sa e vështirë do të jetë të arrihet një marrëveshje që do të bëjë Korenë e Veriut të heqë dorë nga një program që ajo e shikon si kyç për mbijetesën e vet.
Fjalimi i Kim erdhi në një nga festat më të rëndësishme të Koresë së Veriut: përvjetorin e “fitores së popullit koreano-verior në Luftën e Madhe për lirimin e Atdheut”, kjo është mënyra se si Koreja e Veriut i referohet Luftës së Koresë.
Shumica e historianëve pajtohen që konflikti filloi kur Kim Il Sung, gjyshi i udhëheqësit aktual të Koresë së Veriut, pushtoi Jugun në një përpjekje për të ribashkuar gadishullin Korean me forcë. Sidoqoftë, Koreja e Veriut u mëson qytetarëve të saj se lufta filloi kur Shtetet e Bashkuara dhe Koreja e Jugut marshuan në Veri – dhe se Pyongyangu fitoi luftën falë udhëheqjes së Kim Il Sung.
Konflikti është teknikisht ende në zhvillim, pasi palët nënshkruan një armëpushim – jo një traktat – më 27 korrik 1953, që çoi në ndërprerjen e luftimeve. Në dekadat që nga ajo kohë, Koreja e Veriut ka paralajmëruar njerëzit e saj se kërcënimi i pushtimit mbetet, edhe pse konflikti u zbeh./ Opinion.al
