Kim Jong Un mund të ketë munguar në festën kryesore të vendit në 15 Prill për shkak të shqetësimeve për koronavirusin, jo sepse është i sëmurë, tha ministri i Koresë së Jugut për çështjet e Koresë së Veriut.
Mungesa e udhëheqësit të Koresë së Veriut nga ceremonitë publike në përvjetorin e lindjes së gjyshit të tij dhe themeluesit të vendit, Kim Il Sung, ishte e paprecedentë dhe ai nuk është parë në publik që nga ajo kohë.
Kjo ka çuar në disa spekulime për shëndetin e tij.
Zyrtarët e Koresë së Jugut theksojnë se ata nuk kanë zbuluar asnjë lëvizje të pazakontë në Korenë e Veriut dhe kanë paralajmëruar kundër raporteve se Kim mund të jetë i sëmurë.
Koreja e Veriut ka thënë se nuk ka raste të konfirmuara të koronavirusit, por duke marrë parasysh faktin se vendi ka ndërmarrë hapa të rreptë për të frenuar një shpërthim, mungesa e Kim nga ceremonitë nuk është veçanërisht e pazakontë, u tha ministri i unifikimit Kim Yeon-chul ligjvënësve.
“Është e vërtetë që ai kurrë nuk e kishte humbur përvjetorin për ditëlindjen e Kim Il Sung që kur mori pushtetin, por shumë ngjarje përvjetori përfshirë festime dhe një banket janë anuluar për shkak të shqetësimeve të koronavirusit”, tha ai
Ai tha se kishte të paktën dy raste që nga mesi i janarit ku Kim Jong Un ishte jashtë vëmendjes për gati 20 ditë. “Unë nuk mendoj se është e pazakontë duke pasur parasysh situatën aktuale (koronavirus).”
Presidenti amerikan, Donald Trump tha të hënën se ai ka një ide sesi po vepron Kim Jong Un dhe shpreson se është mirë, por nuk u zgjat më tej.
Kryeministri japonez, Shinzo Abe, tha se ishte në dijeni të raporteve mbi shëndetin e Kim dhe se po i kushtonte vëmendje të madhe zhvillimeve.
Koreja e Veriut ka anuluar disa ngjarje të mëdha dhe ka vendosur një bllokim kufijsh dhe masa karantine në përpjekje për të parandaluar një shpërthim të koronavirusit. /Opinion.al
