Udhëheqësi i Koresë së Veriut Kim Jong-un i ka bërë thirrje ushtrisë për ndihmë në zonat e goditura kohët e fundit nga reshjet e mëdha të shiut, raportojnë mediat shtetërore.
Sipas BBC, më shumë se 1.000 shtëpi u dëmtuan dhe rreth 5.000 njerëz u evakuuan pas përmbytjeve që pasuan.
Kjo lëvizje e Kim Jong-un vjen mes shqetësimeve mbi një krizë ekonomike dhe mungesës së ushqimit.
Toka bujqësore është dëmtuar dhe Kim Jong-un tha në qershor se vendi u përball me një situatë “të tensionuar” ushqimore.
Ai deklaroi se në atë kohë sektori bujqësor kishte dështuar në përmbushjen e objektivave të grurit për shkak të tajfunëve vitin e kaluar, të cilat shkaktuan përmbytje, situatë që do të ndikojë edhe në të korrat e këtij viti.
Pamjet tregojnë shtëpitë e përmbytura deri tek çatitë e tyre dhe dëmtimet e urave dhe hekurudhave në provincën lindore të South Hamgyong.
Raporti tregonte gjithashtu se “qindra hektarë tokë bujqësore” u zhytën nën ujë.
Komisioni Qendror Ushtarak i Partisë Punëtore në pushtet mbajti një takim të enjten për të diskutuar rimëkëmbjen nga katastrofa, tha agjencia zyrtare e lajmeve KCNA.
Kim nuk mori pjesë në takim, por zyrtarët e partisë përcollën mesazhin e tij se ushtria duhet të sigurojë furnizimet e nevojshme në rajon, tha KCNA.
Vendi është i izoluar gjithashtu edhe nga pandemia dhe kjo ka bërë që tregtia me Kinën mos të jetë favorizuese për kapërcimin e krizës.
