Irani nuk do të dorëzohet përballë kërkesave të Shteteve të Bashkuara dhe nuk do të pranojë një paqe të imponuar. Kështu ka deklaruar udhëheqësi suprem i Iranit, Ayatollah Ali Khamenei.
Duke ju referuar deklaratës së presidentit amerikan Donald Trump, i cili kërkoi një tërheqje të pakushtëzuar të Iranit nga konflikti tashmë në ditën e gjashtë të tij, në një mesazh të transmetuar në televizionin shtetëror iranian të mërkurën, Khamenei theksoi se “ky komb nuk do të dorëzohet përballë askujt”.
“Irani do të qëndrojë i vendosur ndaj një lufte të imponuar, ashtu siç do të qëndrojë ndaj një paqeje të imponuar,” u shpreh Khamenei.
Gjatë këtij mesazhi, ai shtoi se kushdo që e njeh Iranin dhe historinë e tij, “nuk do të guxonte të fliste me këtë komb me gjuhën e kërcënimeve”.
Gjithashtu, lideri suprem i Iranit paralajmëroi gjithashtu se çdo ndërhyrje ushtarake nga ana e SHBA-së do të sillte “dëme të parikuperueshme”, duke e cilësuar fushatën ushtarake të Izraelit si një “gabim të madh”.
“Do të ndëshkohen për këtë,” përfundoi ai, duke theksuar se vendi i tij është i përgatitur për çdo skenar në vijim.
