Për herë të parë që prej shpërthimit të luftës 12-ditore mes Iranit dhe Izraelit, Lideri Suprem, Ajatollahu Ali Khamenei është shfaqur në publik.
Televizioni shtetëror e tregoi atë teksa përshëndeste besimtarët në një xhami të shtunën, gjatë një ceremonie të mbajtur një ditë para festes Shiite të Ashura-s, shkruan A2.
Dalja e tij në publik dominoi mediat iraniane, ndërsa u transmetuan edhe pamje të mbështetësve që shprehnin gëzim, për shfaqjen e Khameneit.
Ajatollahu duket teksa i drejtohet klerikut të lartë Mahmoud Karimi, duke e inkurajuar të këndoje një këngë patriotike mbi Iranin e cila u bë shumë popullore gjatë konfliktit me Izraelin.
Shfaqja e fundit jopublike e Khameneit, ishte një fjalim i regjistruar pas armëpushimit që i dha fund luftës së nisur në 13 qershor, e gjatë së cilës u vranë komandantët më të lartë ushtarake dhe shkëncëtarët bërthamorë.
Gjatë luftës 12-ditore me Izraelin, Khamenei u shfaq në televizion përmes 3 videomesazheve, ndërsa kishte spekulime se ai dhe familja qëndronin të fshehur në një bunker. Në 27 qershor, ditën kur u arrit armëpushimi ai u shfaq teksa pretendonte fitoren dhe i thoshte Shteteve të Bashkuara se nuk kishin shënuar rezultat nga sulmet ndaj infrastrukturës bërthamore të Iranit.
Presidenti amerikan e akuzoi Khamenein se po gënjente dhe përsëriti pretendimin se sitet bërthamore të Teheranit ishin asgjesuar. Trump tha në atë kohë se e kishte shpëtuar Ajatollahun nga një vdekje e shëmtuar dhe poshtëruese.
