Ministrja e Infrastrukturës dhe Energjisë, njëkohësisht zv/kryeministrja Belinda Balluku, renditi të gjitha arritjet dhe sfidat për “Shqipërinë 2030” në një event të organizuar ditën e sotme.
Një nga projektet që do të përfundojë këtë verë dhe që është një nga kalvaret më të gjata të infrastrukturës sipas saj është rruga Qukës-Qafë Plloçë.
“Duhet thënë që me këtë verë përfundon dhe një nga kalvaret më të gjata të infrastrukturës Qokës-Qafë Plloçë, e cila është një rrugë e ndërtuar në lartësi të Gurrës dhe Oparit me problematika të mëdha në ndërtim dhe në mënyrën e projektimit të asaj kohe. Por që brenda verës së këtij viti do të jetë e dorëzuar dhe ata që aksesojnë drejt Korçës do të kenë mundësi që ta aksesojnë direkt duke lënë mënjanë pra të gjitha kthesat që çojnë në Korçë përmes Qafë Plloçës duke dhënë kështu edhe një ndarje të trafikut, të rënduar shpeshherë në drejtim të daljes së pikës kufitare për në RMV dhe duke e çuar trafikun direkt për në Korçë”, tha ajo.
Sipas ministres më 30 Prill do të dorëzohet edhe aksi Maqellarë-Peshkopi. Sa i përket një tjetër vepre të rëndësishme, si ajo e Bypass-it të Elbasanit ka nisur procesi i aplikimit për financim në bankat e huaja.
“Bypass i Elbasanit që është një vepër që e ka një projekt. Kemi nisur procesin e aplikimit për financim në bankat e huaja. Parashikohet që të jetë një projekt që ka një kosto 250 mln euro. Përveç faktit që është nyja më e rëndësishme e korridorit të VIII, pasi lidh nyjën e Rrogozhinës me pjesën veriore të korridorit, krijon aksesin nga Tirana në Elbasan. Do krijojë edhe aksesin e plotë në zonën ku do të ndërtohet automotoparku që do të jetë një tjetër nukël zhvillimore”, tha Balluku.
Ministrja renditi edhe disa projekte të reja në vitet në vijim. Ndër to, rrugët: Dhërmi-Sarandë, Gjirokastër-Libohovë-Zagori, Tepelenë-Përmet-Ersekë, Berat-Skrapar-Gramsh, Rruga e Lqeneve dhe Rruga e Maleve.
