Personi që shihni në foto është Asqeri Mandri, 34-vjeçari që u arrestua sot, nga Policia e Tiranës pasi prej muajsh dhunonte e mbante mbyllur në shtëpi gruan e tij.
I riu kishte pak muaj që ishte kthyer nga Gjermania e prej atëherë ai kishte vënë kamera në ambientet e banesës në Kodër Institut.
Në çdo dhomë ai kishte vendosur nga 3 kamera në kënde të ndryshme, përfshirë edhe ambientet jashtë.
Sipas Klan neës, pasi u kthye në Shqipëri, i riu ngeli papunë dhe kjo gjë e shtyu të pengonte dhe bashkëshorten të punonte. Ajo ka deklaruar para bluve se nuk ka shkuar 2 javë në punë prej xhelozisë, por është rikthyer.
Kur u pyet pse e monitoronte gruan, Mandri është shprehur “kështu ma dha truri”.
Ndërkohë bashkëshortja deklaron para hetuesve se pas kthimit nga Gjermania ai ka shfaqur shenja të theksuara xhelozie dhe gjithë kohën e shante duke e akuzuar edhe për tradhti. Çifti ka 4 fëmijë, të cilët bashkë me nënën kanë rënë pre e dhunës së vazhdueshme.
Denoncimin në polici e ka kryer bashkëshortja, e cila ka kërkuar ndihmë dhe agjentët e Komisariatit nr. 3 kanë gjetur shtëpinë të monitoruar me kamera. Në pamjet e kamerave të sigurisë shfaqet 34 vjeçari i cili në momente të ndryshme teksa luante me fëmijët ngrihej dhe ushtronte dhunë ndaj gruas. Edhe vëllai i tij rezulton i dënuar për dhunë në familje.
