Përveç deklaratave publike, SHBA dhe Rusia kanë zhvilluar bisedime sekrete lidhur me luftën në Ukrainë.
Wall Street Journal deklaron se këshilltari amerikan për sigurinë kombëtare, Jake Sullivan, ka zhvilluar bisedime me ndihmësit e presidentit rus Vladimir Putin, me synimin për të reduktuar rrezikun që lufta në Ukrainë mund të përhapet ose të përshkallëzohet në një konflikt bërthamor.
Sipas kësaj medie, figura e lartë e Shtëpisë së Bardhë kishte zhvilluar biseda të fshehta në muajt e fundit me ndihmësin e Kremlinit Yuri Ushakov dhe sekretarin e Këshillit të Sigurimit rus, Nikolai Patrushev, homologun e Sullivan, të cilat nuk u bënë publike.
Ky lajm nuk është konfirmuar nga SHBA apo nga Rusia, ndërsa Wall Street Journal nuk e ka bërë të qartë se kur kanë ndodhur këto bisedime.
Zëdhënësi i Kremlinit, Dmitry Peskov nga ana tjetër nuk pranoi të komentojë mbi raportin në konferencën e tij të përditshme nga pallati zyrtar. “E përsëris edhe një herë se ka disa raporte të vërteta, por në pjesën më të madhe ka raporte që janë spekulime të pastra,” u tha ai gazetarëve.
