Këshilli Kombëtar i Partisë Demokratike miratoi në unanimitet vendimin për djegien e mandateve të deputetëve. Lajmi është bërë i ditur nga Kryetari i PD-së, Lulzim Basha, i cili foli para mbështetësve të mbledhur jashtë Selisë së PD. Tani 43 deputetët duhet të shkojnë në KQZ dhe të dorëzojnë deklaratën se heqin dorë nga mandati i deputetit.
Më herët gjatë ditës, Sekretari për çështjet ligjore në Partinë Demokratike, Çlirim Gjata, tha se janë përgatitur deklaratat në të cilat deputetët e PD-së do të dorëzojnë mandatet e tyre. Ai theksoi se dorëzimi i mandateve është nominal dhe jo kolektiv.
Ndërkohë që deputetët do ta dërgojnë deklaratën e tyre në Kuvend, pjesa tjetër, që gjendet në listat e PD-së dhe që fiton automatikisht mandatin për shkak të dorëzimit të të parëve, do ta dërgojë deklaratën në KQZ. Lista e PD rezulton të jetë me 194 kandidatë, nga të cilët fituan vetëm 43, që do të thotë se ka 151 kandidatë që mund të zëvendësojnë 43 të larguarit./ Dl.Opinion.al
