Këtë të premte grupi i mbështetësve të Lulzim Bashës ka publikuar vendet ku do të votohet nesër për kryetarin e ri të PD. Qendrat e votimit do të jenë të hapura nga ora 08:00 deri në orën 19:00.
Grupi i Bashës duket se nuk do të tërhiqet pavarësisht se në mbledhjen e djeshme të Këshillit Kombëtar të PD-së, 245 anëtarë votuan që të anulohen zgjedhjet për kryetar.
“Të nderuar anëtarë dhe drejtues të Partisë Demokratike në të gjithë Shqipërinë! Nesër më datë 29.07.2023, zhvillohet procesi i zgjedhjeve për Kryetar të PDSH! Ftojmë të gjithë anëtarët e Partisë Demokratike të marrin pjesë në këtë proces mjaft të rëndësishëm për ringritjen e PD. Qendrat e votimit do të jenë të hapura nga ora 08:00 deri në 19:00. Ju vendosni të ardhmen e PD dhe të ardhmen e Shqipërisë”, thuhet në njoftim.
Këshilli Kombëtar i PD zhvilloi dje një mbledhje online të thirrur nga kreu i grupit parlamentar të PD, Gazment Bardhi.. Anëtarët e saj e konsiderojnë procesin e 29 Korrikut si antistatutor dhe farsë.
