Kësaj i thonë ti biesh nga Kina!

Nëse jetoni në Tiranë apo në qytete të tjera që detyrimisht kalimin tokësor e kanë  nëpërmjet kryeqytetit shqiptar dhe keni një biletë për të parë ndeshjen Shqipëri-Serbi, edhe pse orari i ndeshjes është në mbrëmje, ju kujtojmë se për të arritur në Elbasan, qytetin ku luhet ndeshja, ju duhet të niseni herët në mëngjes ose ti bini nga Kina sipas një shprehje të vjetër popullore. Gjithçka falë masave të çuditshme organizative që ka publikuar Policia e Shtetit. Sipas njoftimit të së cilës nga ora 12.00 deri në orën 19.00 të së enjtes asnjë automjet nuk do të lejohet të kalojë nëpërmjet tunelit të rrugës Tiranë-Elbasan. Çka automatikisht do të thotë se të gjitha automjetet do të duhet të kalojnë nëpërmjet aksit rrugor Durrës-Rrogozhinë-Peqin-Elbasan. Njësoj si ta kapësh veshin me dorën e majtë kur të djathtën e ke të lirë.