Ish-balerini shqiptar Ilir Kerni është emëruar Drejtor i Baletit në Teatrin Kombëtar të Splitit.Lajmin fillimisht e ka bërë të ditur sopranoja Ermonela Jaho, e cila uron kolegun e saj në rrjetet sociale.
“Urime Ilir Kerni për emërimin e merituar si Drejtor i Baletit në Teatrin Kombëtar të Splitit dhe komplimenta kroatëve për largpamësinë dhe vlerësimin ndaj një vlere artistike kombëtare shqiptare si ju”, shkruan sopranoja.
Kerni ka mbajtur për më shumë se dy vite dhe postin e Drejtorit të Teatrit Kombëtar të Operas dhe Baletit, ndërsa u detyrua që të dorëhiqej për shkak të konflikteve me ministren e Kulturës, së asaj kohe, Mirela Kumbaro.
Në postimin pas largimit, ai sqaronte se në vendin tonë arti është shumë pak i vlerësuar dhe se “Vetëm Kosova, pa përmendur vendet e rajonit, ka 9 herë më shume buxhet për programin artistik”.
Ky zhvillim ka sjellë reagime të shumta në Tiranë, por jo vetëm, duke theksuar se ka qenë kjo qeveri që e largoi nga vendi.
Gazetari dhe zëvendësdrejtori i përgjithshëm i RTSH, Martin Leka në një postim në rrjetet sociale shkruan: Para pak ditësh, në një komunikim me të, Ilir Kerni me dha lajmin se ishte zgjedhur Drejtor i Baletit në Teatrin Kombëtar të Splitit dhe mu lut ta mbaja për vete! Nuk kishte pike emocioni, ndërkohë që unë edhe tani nuk di nëse e urova apo jo, ndërkohë që mendoja: e kishim këtu dhe e “zbuam” me teknikat moderne te indiferencës e pengesave…/ Opinion.al
