Pjetër Prendi është shpallur në kërkim nga policia për blerje të votave nga qytetarët e Shkodrës. Mësohet se 42, vjeçari premtonte qytetarëve para në emër të Tom Doshit. Vetë Doshi ka bërë kallëzimin në polici ndaj këtij personi. Prendi premtonte 10 mijë lekë për votë.
Njoftimi i Policisë
Në kuadër të punës së Policisë së Shtetit për parandalimim dhe goditjen e veprave penale në fushën e zgjedhjeve.
Në datë 17.06.2017, nga Seksioni Kundër Krimit Ekonomiko-Financiarë në Drejtorinë Vendore të Policisë Shkodër, u referuan materialet proçeduriale në Prokurorinë e Rrethit Gjyqësor Shkodër u shpall në kërkim dhe punohet për kapjen e shtetasit P. P. 42 vjeç, banues në Shkodër.
Ky shtetas dyshohet se u ka premtuar me iniciativën e tij disa shtetasve nga 10.000 lekë për çdo votë që do jepej për një kandidat për deputet në Qarkun Shkodër.
Vepra penale në ngarkim të shtetasit P.P. është “Dhënia e shpërblimeve dhe e premtimeve” parashikuar nga neni 328 i Kodit Penal.
