Këshilli i Lartë Gjyqësor ka rrëzuar kërkesën e gjyqtarit Guximtar Boçi për t’u kthyer në detyrë.
Një nga pikat kryesore të rendit të ditës të KLGJ ishte shqyrtimi i kërkesës së gjyqtarit Boçi për tu kthyer në detyrë.
Ish-kryetari i Gjykatës së Gjirokastrës Guximtar Boçi u pezullua nga detyra pas një denoncimi të emisionit “Stop” në vitin 2016 ku ai i kërkonte favore seksuale një qytetareje, për një çështje gjyqësore.
Kur u denoncua rasti, Këshilli i Lartë i Drejtësisë pezulloi nga detyra gjyqtarin Guximtar Boçi. Prokuroria e Krimeve të Rënda që duhet të hetonte rastin, shpalli moskompetencë dhe e kaloi në Prokurorinë e Fierit. Dosjen e mori në dorë prokurorja Elida Hoxhaj, e cila vendosi ta pushojë këtë çështje.
Por, pavarësisht pushimit të çështjes në mënyrë flagrante, gjyqtarja Okleda Liço (Manellari) e prishi këtë vendim dhe e riktheu dosjen për gjykim. Gjyqtarja Okleda Liço i kërkoi prokurores Elida Hoxhaj që të bëjë hetim të thelluar për këtë dosje, duke përfshirë akt-ekspertimin për autenticitetin e zërit të gjyqtarit Guximtar Boçi dhe denoncueses R.I., sikurse e përcakton ligji. Madje, kërkoi që prokurorja Elida Hoxhaj të thërrasë dy personat e përfshirë për t’iu marrë dëshminë. Asnjë nga këto nuk ndodhi.
Prokurorja e Fierit Elida Hoxhaj e apeloi vendimin e gjyqtares Okleda Liço, e cila kërkoi hetim të thelluar për dosjen e Guximtar Boçit. Ishte Gjykata e Apelit të Vlorës që e mbylli sërish çështjen ndaj ish-kryetarit të Gjykatës së Gjirokastrës. Mungesa e gjykimit të kësaj dosje, duke pushuar hetimet ndaj gjyqtarit Guximtar Boçi, bëri që ky i fundit të kërkonte edhe rikthimin në detyrë.
Megjithatë kërkesa e tij nuk është pranuar në mbledhjen e sotme të KLGJ-së. /Opinion.al
