Gjykata e Lartë ka rrëzuar kërkesën e ish-ministrit të Brendshëm, Saimir Tahiri për pezullimin e dënimit me burg.
Në njoftim bëhet me dije mospranimi i kërkesës për vendimin e dhënë më datë 4 shkurt 2022.
“Mospranimin e kërkesës së kërkuesit Saimir Tahiri, për pezullimin e ekzekutimit të vuajtjes së dënimit me burgim, dhënë me vendimin nr. 3 datë 04.02.2022, të Gjykatës së Posaçme të Apelit për Korrupsionin dhe Krimin e Organizuar”-bën me dije gjykata në njoftim.
Ish-ministri i Brendshëm, Saimir Tahiri, u dënua nga GJKKO me 3 vjet e 4 muaj burg për shpërdorim detyre.
Në prill të këtij viti, ai kërkoi lirimin nga burgu i Fierit pasi sipas tij vendimi i Apelit është marrë në kundërshtim me ligjin. Në rekursin e bërë nëpërmjet avokatit të tij në Gjykatën e Lartë Saimir Tahiri shprehet se Gjykata nuk ka vepruar drejt sepse e ka dënuar jashtë kompetencave te saj. Sipas ish-ministrit të Brendshëm dhe mbrojtësit të tij Tahirit i rrezikohet jeta, ndërsa familja e tij është ekspozuar ndaj eksponentëve të krimit.
