Pas kërkesës së SPAK drejtuar Kuvendit për arrestimin e deputetit, Alqi Bllako, ka reaguar për herë të parë PS.
Kreu i grupit parlamentar të PS, Taulant Balla, është shprehur se Partia Socialiste nuk është mburojë për askënd. Ai tha se procedurat do të vijojnë pa asnjë pengesë djhe vonesë.
“Unë nuk jam i gëzuar për askënd që kërkohet një masë sigurie arrest me burg, në aspektin njerëzor, apo të qenit koleg, kështu që në aspektin njerëzor, nuk jam i gëzuar. Por ka një aspekt tjetër, forca udhëheqëse në çuarjen përpara të reformës në drejtësi gjithmonë ka pasur qëllimin të vendoset para drejtësisë gjithkush, pa asnjë dallim nga krahu politik nga i cili vjen. PS nuk është mburojë për askënd, kjo duhet të jetë vijë e kuqe për këdo. Do mbajmë këtë qëndrim”, tha Balla.
