Partia Demokratike i ka kërkuar zyrtarisht Autoritetit të Mediave Audiovizive, shtyrjen e afatit të mbylljes së frekuencave analoge deri në mundësimin e dekoderave për të gjitha familjet shqiptare.
Në kërkesën e Kryetares së Komisionit të Medias, Albana Vokshi për AMA-n theksohet se ndërprerja e transmetimeve televizive, është ndër të tjera, një shkelje e hapur e të drejtës kushtetuese për informim.
Kërkesa për shtyrjen e afatit është firmosur nga të gjithë deputetët e opozitës në Komisionin e Medias.
Në letër thuhet se:
‘Ndërprerja e transmetimeve televizive është, ndër të tjera, një shkelje e hapur e të drejtës kushtetuese për informim, siç parashikohet në nenin 23 të Kushtetutës së Shqipërisë dhe nenin 10 të Konventës Europiane për të Drejtat e Njeriut’.
“Duhet të sjellim në vëmendjen tuaj se shteti dhe institucionet e tij kanë detyrimin jo vetëm të njohjes së të drejtave formalisht, por edhe garantimit të tyre në praktikë”.
