Dy persona të cilët akuzohen për gjobvënie janë arrestuar ditën e sotme nga polica e Tiranës.
Burime nga policia bëjnë me dije se pas disa javësh hetime është bërë i mundur finalizimi me sukses i operacionit të koduar “Përsëritësit”. Si rezultat kanë rënë në pranga shtetasi E.G, 30 vjeç, banues në Tirane, me precedent penal në fushën e gjobvënies dhe I.B, 18 vjeç, banues në Tiranë. Gjithashtu është shpallur në kërkim një 35 vjeçar, me banim në Tiranë.
Këta tre shtetas dyshohen se në periudha të ndryshme kohore kanë vendosur gjoba me anë të kërcënimeve ndaj qytetarëve në qytetin e Tiranës. Policia bën me dije një rast konkret për një gjobë 12 mijë euro të vendosur nga ky grup kriminal. Shtetasit raportohet se i janë marrë deri tani 7,500 euro
Nga ana e grupit hetimor vazhdon puna intensive për dokumentimin e plotë ligjor të kësaj ngjarjeje dhe disa ngjarjeve të tjera që dyshohen se janë kryer nga këta persona.
Materialet do t’i kalohen për ndjekje të mëtejshme Prokurorisë pranë Gjykatës së Shkallës Parë për Krime të Rënda për veprën penale “Shtrëngimi me anë të kanosjes ose dhunës për dhënie pasurie, e kryer në bashkëpunim”.
Kujtojmë se dy ditë më parë policia e Durrësit arrestoi tre persona për gjobvënie pasi kishin kanosur me jetë një biznesmen me qëllim që ti merrnin një shumë prej 50 mijë eurosh. /Opinion.al
