Një 22-vjeçar është shpallur në kërkim nga policia pasi ka kanosur me armë zjarri pistoletë, një shtetas me inicialet G. N., dhe i ka marrë atij automjetin dhe është larguar. Sipas policisë, ngjarja ka ndodhur rreth orës 21:15 të mbrëmjes së djeshme, në aksin rrugor Bajram Curri-Fierzë.
22-vjeçari, kur ka konstatuar se po ndiqej nga Policia, në vendin e quajtur “Kalata e trageteve”, Fierzë, ka braktisur automjetin tip “Lançia” dhe duke përfituar nga errësira, ka mundur të largohet.
Uniformat blu po vijojnë kontrollin e zonës, për kapjen e 22-vjeçarit dhe sekuestrimin e armës së zjarrit pistoletë.
I riu akuzohet për veprat penale “Vjedhja me armë”, “Kanosja” dhe “Prodhimi dhe mbajtja pa leje e armëve luftarake dhe e municionit”.
Materialet i kaluan Prokurorisë pranë Gjykatës së Rrethit Gjyqësor Tropojë, për veprime të mëtejshme./Opinion.al
