Shtypi britanik sot ka pasqyruar historinë e një shqiptari që u largua në vitet ’90 në drejtim të Britanisë së Madhe. Ai u bë i njohur pasi u filmua duke kërcënuar bashkëshorten e me thikë në fyt.
Ardian Rragami u ekstradua për herë të parë nga Britania në Shqipëri në vitin 2009 për të vuajtur një dënim 15-vjeçar për vrasjen e fqinjit të tij, në vitin 1998 në qytetin e Shkodrës. Por pasi bëri vetëm 4 vite në burg u rikthye për të jetuar në Britaninë e Madhe.
Ai kaloi sërish kufirin në vitin 2016 dhe shkoi në Wickford, Essex me gruan e tij britanike Chrysoulla Michaels dhe dy vajzat e tyre, 13 dhe 15 vjeçe. Por u arrestua po në qershor të atij viti. Ai kishte kërkuar anulimin e vendimit për deportimin e tij nga Anglia me argumentin se largimi i tij do e ndante nga familja. Ndaj gjykata vendosi në favor të tij, duke i dhënë 47-vjeçarit lirinë me kusht.
Momentalisht ai po ‘lufton’ për t’iu shmangur një ekstradimi të dytë në Shqipëri duke cituar të drejtën për një jetë familjare. Por kjo vështirë ta mbrojë kësaj here, pasi Rragami është filmuar duke i vendosur thikën në fyt, gruas së tij në shtëpinë e tyre në Wickford.
Në Gjykatën e Basildon ai u deklarua fajtor për sulmin ndaj bashkëshortes pasi e ka goditur dhe i ka prerë nofullën me një thikë kuzhine, si dhe ka sulmuar një fëmijë. Tashmë bashkëshortja e tij Michaels, e cila punon parukiere, po i lutet qeverisë britanike për deportimin e shqiptarit.
“Ardiani ka përdorur të drejtën e tij për një jetë familjare që të qëndrojë këtu. Kam ngecur e mbërthyer tek ai dhe derisa të deportohet nuk do ndalet kurrë”, tha ajo për The Sun./E.M
