Pas rreth një ore qëndrimi në lartësinë e një vinçi, ish-i përndjekur Xhemal Zhuri ka zbritur nga lartësia. 61 vjeçari kërcënoi me hedhje nga lartësia për shkak se nuk kishte marrë këstin e radhës për vitet e burgut të kryera gjatë periudhës së diktaturës komuniste. Në njoftimin e saj për rastin, Policia e Tiranës tha se 61 vjeçari nuk kishte marrë këstin e gjashtë.
Ky vinç është përdorur disa herë nga persona që kanë kërcënuar me hedhje nga lartësia për motive të ndryshme. Sipas Agjencisë së Pagesave për ish-të përndjekurit politikë, bëjnë me dije se këtij shtetasi i është paguar i 6-të, ndërsa nga data 10 shkurt e këtij viti i është hedhur edhe kësti i 7-të i shumës financiare.
“Më datë 23.02.2017, rreth orës 16:30, në rrugën “Ibrahim Rrugova”, përballë Kishës Ortodokse, tek një pallat në ndërtim ka hipur në vinç, shtetasi Xh. Zh., 61 vjeç, i cili tenton të hidhet, pasi nuk ka marrë këstin e gjashtë të parave, si i persekutuar politik. Policia në vendin e ngjarjes po negocion për të bërë të mundur zbritjen e tij”, thuhej në njoftimin e policisë.
