Pas SHBA edhe Bashkimi Europian ka shprehur shqetësime për kërcënimet e bëra ndaj gjyqtarëve dhe prokurorëve.
Delegacioni i BE në vendin tonë deklaron se është i shqetësuar për kërcënimet që u bëhen zyrtarëve të drejtësisë, teksa u bën thirrje autoriteteve që këto raste të hetohen sa më shpejt.
“Delegacioni i BE-së në Shqipëri është thellësisht i shqetësuar për kërcënimet e bëra ndaj autoriteteve të drejtësisë që punojnë çdo ditë në luftën kundër krimit të organizuar në Shqipëri. Ne mirëpresim angazhimin e autoriteteve shqiptare për të hetuar me shpejtësi këto kërcënime dhe për të mbajtur përgjegjës autorët. BE-ja mbështet plotësisht të gjithë zyrtarët që punojnë në luftën kundër korrupsionit dhe krimit të organizuar në Shqipëri, dënon çdo formë sjelljeje kërcënuese ndaj tyre dhe vazhdon të mbështesë vendin në përpjekjet e tij për forcimin e shtetit të së drejtës”,-thuhet në deklaratën e delegacionit të BE./ Opinion.al
