Ministri francez i Drejtësisë Eric Dupond-Moretti tha se autoritetet franceze kishin nisur 22 hetime pas një breshëri alarmesh të rreme për bomba.
Aeroportet e Francës kanë marrë 60 kërcënime me bombë në tre ditët e fundit, tha ministri francez i Transportit Clement Beaune.
“Gjithsej 17 aeroporte morën kërcënime me bombë të mërkurën… Të enjten, 25 aeroporte morën kërcënime me bombë. Dhe sot, që në mëngjes herët, janë prekur 18 aeroporte,” tha ai në transmetim live.
Si rezultat, 44 evakuime u kryen nga e mërkura deri të premten, tha Beaune. Ministri e cilësoi situatën si të papranueshme dhe u bëri thirrje aeroporteve të raportojnë në polici sa herë që merreshin kërcënime të rreme për bombë. Një shkelje e tillë dënohet deri në tre vjet burg dhe gjobë prej dhjetëra mijëra eurosh, tha ministri. Ai gjithashtu u zotua se do të mbajë përgjegjës shkelësit.
Franca kohët e fundit ka parë një rritje të numrit të bombave të rreme dhe kërcënimeve terroriste. Të mërkurën, 15 aeroporte në të gjithë Francën u evakuuan, me disa të tjerë të nesërmen.
Vizitorët në Pallatin e Versajës u evakuuan katër herë këtë javë, ndërsa Luvri u detyrua të mbyllet për arsye sigurie./Opinion.al
