Kryeministri në detyrë i Kosovës, Albin Kurti ka thënë se presidenti, Hashim Thaci, do të duhej të intervistohej nga prokurori i shtetit.
Kurti ka komentuar deklaratat e Presidentit Hashim Thaçi, i cili deklaroi në një studio televizive në Kosovë, se Lëvizja Vetëvendosje e ka sajuar kërcënimin e bërë nga Garda Vullnetare Shqiptare.
Sipas Kurtit, nëse Thaçi është i sigurt se VV e ka sajuar një kërcënim të tillë, atëherë ai duhet të intervistohet nga prokurori i shtetit.
“Presidenti meqenëse ka informacione të tilla do të duhej të intervistohej nga prokurori i shtetit së paku si dëshmitar. Nëse paska informacione të tilla ai duhet t’iu ndihmojë institucioneve të drejtësisë të zbardhin këtë kërcenim ndaj meje. Këto janë deklarata të pamatura dhe të bazuara të presidentit të frustruar dhe në panik. Meqenëse është i pakënaqur që është nga ulësja e tij. Unë i pata ofruar të jap dorëheqjen dhe të vij në garë zgjedhore sepse nuk po sillet si president, por si një politikan opozitar”. deklaroi ai.
Kyeministri Kurti ka pretenduar se është kërcënuar nga, siç është shprehur ai, e ashtuquajtura “Garda Vullnetare Shqiptare”.
Në shkresën e kësaj Garde, të publikuar nga Kurti, Lëvizja Vetëvendosje konsiderohet organizatë kriminale, derisa thuhet se pas informatave për organizim të protestave në Prishtinë më 29 maj, njësitet e Gardës në fjalë “do të jenë gjithandej dhe ku do të paraqitet nevojë do t’i dalim në mbrojtje vendit”.
Kryeministri në detyrë po ashtu ka theksuar se nuk i druhet vendimit të Kushtetueses, por sipas tij, këtë drojë e ka vet Presidenti i cili në çdo mënyrë po tregon që ka frikë se do ta humbasë rastin.
Ai ka thënë se do ta respektojë vendimin e Gjykatës Kushtetuese që pritet të shpallet më 29 maj sepse beson se gjyqtarët do të marrin vendim kushtetues dhe jo anti-kushtetues.
“Unë dua të besoj që ata do të bëjnë vlerësimin në mënyrë profesionale, të pavarur dhe të paanshme. Nuk bëhet fjalë për asnjë cenim nga ana ime. Përkundrazi unë jam i interesuar që ata të mbrohen maksimalisht… Ne do të respektojmë aktgjykimin e Gjykatës Kushtetuese përderisa ai është interpretim i kushtetues siç është misioni i Gjykatës Kushtetuese”, tha Kurti. /Opinion.al
