Këngëtarja e famshme e hitit “Mercy”, Aimme Duffy ka shokuar të gjithë ndjekësit e saj me postimin e fundit në Instagram.
Në një rrëfim aspak të zakonshëm këngëtarja nga Uellsi, që u largua nga jeta publike pas publikimit të albumit të suksesshëm “Rockferry,” tha se është droguar, marrë peng dhe përdhunuar nga një njeri i panjohur për disa ditë.
“Shumë prej jush kanë pyetur veten se ku jam zhdukur, apo çfarë ka ndodhur me mua. E vërteta është se jam përdhunuar, droguar dhe mbajtur peng për disa ditë. Kam mbijetuar dhe rekuperimi ka kërkuar kohën e vet”, shkroi ajo.
Duffy nuk sqaron kohën kur ndodhi ngjarja, por shpjegon se vendosi të flasë publikisht pasi e kontaktoi një gazetar.
“Ishte i sjellshëm dhe u ndjeva shumë mirë kur fola… Pas disa javësh do të publikoj një intervistë. Nëse keni pyetje, dua t’u përgjigjem aty, nëse mundem.”, shkruan Duffy.
Këngëtarja kërkoi mbështetje dhe respektim të privatësisë gjatë kësaj periudhe teksa shtoi:
“Ndoshta vrisni mendjen pse s’përdora zërin për të shprehur dhimbjen që ndjeja? Nuk doja t’i tregoja botës trishtimin në sytë e mi. Pyeta veten, si mund të këndoj nga thellësia e zemrës nëse e kam zemrën e thyer. Por ngadalë zemra u ngjit.”
Albumi i parë i Duffy, “Rockferry,” ishte një sukses i jashtëzakonshëm. Ai ishte albumi më i shitur në Mbretërinë e Bashkuar, fitoi tre Brit Awards dhe një Grammy dhe shiti mbi 9 milionë kopje./Opinion.al
