Në Serbi fushata parazgjedhore për zgjedhjet e 17 dhjetorit, që janë parlamentare e komunale, është në vlugun e saj. Në të gjitha tubimet e subjekteve politike, si ato pushtetare e opozitare, Kosova mbetet temë kryesore.
Madje presidenti i Serbisë, Aleksandar Vuçiç, emrin e të cilit e bartë lista zgjedhore e Partisë Përparimtare të Serbisë (SNS), në disa tubime i shtoi pretendimet se “Kosova është pjesë e Serbisë”, raporton Klan Kosova.
Udhëheqësi i Grupit të Politikave të Ballkanit (BPRG), Naim Rashiti, thotë se Kosova është gjatë temë diskutimi në Serbi e që shërben për vota. Sipas tij, diskursi nacionalist është rritur në skenën publike serbe, sidomos në 10 vitet e fundit.
Kurse opinionisti nga Serbia, Dushan Janjiq, pohon se prania aq e madhe e Kosovës në fushatën parazgjedhore, nuk do sjellë vota. Ai thekson se shoqëria serbe është futur në pasiguri totale, përderisa udhëheqësi aktual i këtij shteti, siç thotë, ka dështuar.
“Jo, kjo nuk sjellë vota, madje edhe vetë Vuçiqi e përmend këtë. Ai e ka të qartë dhe të gjithë e kanë të qartë, sepse këtu nuk ka njerëz analfabetë, dhe njerëzit e dinë se me rastin e Banjskës, ka dështuar politika e tij”, tha Janjiq për Klan Kosova.
Në Serbi, për zgjedhjet e 17 dhjetorit, garojnë edhe lista që thërrasin për njohjen e Kosovës dhe afrimin e Serbisë me perëndimin, si dhe lista nacionaliste siç është ajo me emrin “Partia Ruse”. /Klankosova.tv
