Prishja e Teatrit Kombëtar duhet të na zgjojë për të krijuar një front të përbashkët për rivedosjen e demokracisë, shkruan Presidenti Ilir Meta.
Në një status në Facebook, ai i është kthyer sërish çështjes së teatrit duke e cilësuar kriminale shembjen e godinës dhe për këtë bën përgjegjës “dhunën barbare” të pushtetit.
Presidenti ka ndarë gjithashtu një këngë dedikuar teatrit e cila është shkruar dhe këndohet nga dy artistë italianë dhe titullohet “Atë natë të shtune, përse?”.
“Shembja brutale e Teatrit Kombëtar, ka indinjuar jo vetëm artistët në Shqipëri, por edhe në Europë, të cilët revoltën e tyre kundër dhunës dhe barbarisë ndaj trashëgimisë kulturore e historike të vendit tonë po e shprehin me art.
“Atë natë të shtune, përse?”, është kënga homazh që dy muzikantët e mirënjohur Marco dhe Daria Zappa kanë krijuar si shprehje të dhimbjes për shkatërrimin kriminal të vlerave kulturore të kombit tonë nga dhuna e pushtetit.
Një këngë homazh që duhet të na zgjojë dhe frymëzojë të gjithëve, për të krijuar një FRONT TË PËRBASHKËT PËR RIVENDOSJEN E DEMOKRACISË.”- shkruan Meta./Opinion.al
