Sipas demokratit Belind Këlliçi, nuk ka forcë politike në rajon e as në rang bote që ka qeverisur në mënyrë kriminale për 12 vite, referuar Partisë Socialiste. I ftuar në studion e Klan News, ai foli edhe për fushatën elektorale, duke theksuar se më 12 Maj duhet të jetë Partia Demokratike ajo që do udhëheqë procesin e negociatave me Bashkimin Evropian.
“PD dhe Sali Berisha premtimet e tyre i ka mbajtur, flas me prova. A ka pasur probleme në qeverisje?! Patjetër që po, por po të vësh në peshore 8 vite qeverisje të PD-së me 12 vite të PS-së… Më vjen keq, por kjo është një organizatë kriminale! Ju ftoj të më thoni një parti politike në Ballkan, Europë e botë që ka kaq shumë zyrtarë në burg. Gjysma e kabinetit qeveritar janë hajdutë”, u shpreh ai.
“Njëri kanabizoi Shqipërinë e tjetri shpiku 5D-në”, tha për ish-ministrin Saimir Tahiri dhe kryebashkiakun eTiranës Erion Veliaj.
Duke u ndalur specifikisht te figura e kryeministrit Edi Rama, tha se që në krye të herës ai ka pasur vetëm një qëllim. “Rama që kur erdhi në krye të PS, kishte filozofinë e tij për të kriminalizuar partinë dhe më pas gjithë shoqërinë shqiptare, kriminalizoi biznesin dhe segmente të caktuara të medias”, deklaroi Këlliçi.