Këshilli i Emërimeve në Drejtësi përfundoi verifikimet për një pjesë të kandidatëve për vendet vakante për Gjykatën Kushtetuese dhe Inspektorin e Lartë të Drejtësisë.
KED njofton se ka vendosur të ndalojë kandidimin për gjyqtarë në Gjykatën Kushtetuese të 7 kandidatëve, Valbona Bala, Klodian Rado, Rexhep Bekteshi,Sinan Tafaj, Petrit Kaja, Gëzim Allaraj, Fiona Papajorgji, të cilët kishin paraqitur interesin pas shpalljes së vakancave nga Institucioni i Presidentit të Republikës e Kuvendi.
Nga ana tjetër KED ka miratuar lejimin e kandidimit për gjyqtare në Kushtetuese të Elsa Toskës, e cila ka aplikuar për vendet vakante që ka shpallur Presidenti dhe Kuvendi, ndërsa për vendin vakant të Inspektorit të Lartë të Drejtësisë, ka vendosur të lejojë kandidimin e Artur Metanit dhe të ndalojë atë të Genci Gjonçajt.
Në njoftimin e KED thuhet gjithashtu se në mbledhjen e radhës do shqyrtohen kandidaturat e Eris Hysit, Klodian Rados, Zhaklina Petos dhe Marsida Xhaferllarit. Procedura e vlerësimit të kandidatëve nga KED përfshin kontrollin e pasurisë, figurën dhe integritetin si dhe kushtet ligjore që mundësojnë kandidimin./Opinion.al
