Këshilli i Emërimeve në Drejtësi ka nisur intervistimet e kandidatëve për Gjykatën Kushtetuese dhe për Inspektorin e Lartë të Drejtësisë.
Gjatë mbledhjes u miratuan edhe ekspertët e gjuhës së huaj, të cilët do të intervistojnë kandidatët për Gjykatën Kushtetuese dhe Inspektorin e Lartë të Drejtësisë në gjuhët e huaja të deklaruara prej tyre.
Pas shpalljes së procedurës së vlerësimit, pikëzimit dhe renditjes, para KED doli prokurori i Krimeve të Rënda, Besnik Muçi, i cili iu përgjigj për thuajse një orë pyetjeve të anëtarëve të KED mbi Gjykatën Europiane të të Drejtave të Njeriut dhe raportit të saj me Kushtetuesen, si edhe me risitë që synonte të sillte kandidati.
Intervistimet e kandidatëve të tjerë do të zhvillohen në mbledhjen e së premtes, kur dhe pritet vendimmarrja e këshillit për mënyrën se si do të procedohet për një vakancë në ILD dhe dy vakanca në Kushtetuese, të cilat u krijuan pas moslejimit të kandidimit të disa prej aplikantëve që nuk përmbushnin kriteret ligjore./Opinion.al
