Komentet e bëra në rrjetin social “TikTok” ku regjistron më shumë se 70 mijë ndjekës mesa duket i kanë hapur probleme me ligjin reperit Cllevio Serbiano.
37-vjeçari Kleviol Ahmetaj që njihet me emrin e artit Cllevio Serbiano u vu në pranga mbrëmjen e së shtunës kur sapo ishte kthyer nga Italia, pasi Policia e Durrësit e kishte shpallur në kërkim për përndjekje.
Tre ditë më parë në komisariatin e Durrësit kishte bërë kallëzim për përndjekje Rigels Rajku, i njohur me emrin e artit Noizy, pasi në rrjetin social “TikTok” Cllevio e kërcënonte dhe ofendonte dhe kjo i shkaktonte gjendje ankthi dhe frike.
Pas kallëzimit, policia e Durrësit e shpalli në kërkim dhe urdhëroi njoftimin e tij në kufi ku u vu në pranga sapo u kthye nga Italia.
Njoftimi i Policisë:
“Specialistët për Hetimin e Krimeve të Komisariatit të Policisë Durrës ndaluan shtetasin K. A., 37 vjeç, banues në Lushnjë, për veprën penale “Përndjekja”, pasi ka përndjekur disa herë, në rrjetet sociale, shtetasin R. R., banues në Durrës.
Shtetasi K. A. është ndaluar në Rinas, në hyrje të Republikës së Shqipërisë, nga shërbimet e Komisariatit Rinas, pasi ishte shpallur në kërkim nga Komisariati i Policisë Durrës.”
Kujtojmë se dy reperët kanë pasur edhe përplasje të tjera virtuale dhe fizike me njëri tjetrin.
