Gjykata ka liruar nga burgu babain e dy fëmijëve, që humbën jetën në aksident, duke udhëtuar në makinë me nënën e tyre. Kështu sot Gjykata i ndryshoi masën të dënuarit Sokol Negollari, i cili ishte arrestuar për ndërtim të paligjshëm, duke vendosur detyrim paraqitje.
2 fëmijët e mitur mbetën viktimë e një aksidenti tragjik pasditen e së shtunës, në Qerret të Kavajës. Mjeti tip “Benz” që drejtohej nga nëna e tyre devijoi nga rruga dhe u përplas me trafikndarësen e autostradës. Silva Negollari ishte duke udhëtuar nga Durrësi në drejtim të Rrogozhinës bashkë me 3 fëmijët e saj të moshës 1, 3 dhe 5 vjeç.
Humbja e kontrollit dhe përplasja me trafikndarësen rezultoi fatale për 2 nga tre vëllezërit. Aksidentit i mbijetoi vetëm foshnja 1 vjeç dhe nëna e tyre. Depërtimi i llamarinës anësore të rrugës në brendësi të automjetit dyshohet të ketë shkaktuar vdekjen e menjëhershme të dy fëmijëve. Për të nxjerrë viktimat nga automjeti u desh sharrimi i barrierave metalike. 24 – vjeçarja po udhëtonte drejt burgut të Rrogozhinës bashkë me fëmijët, për të takuar bashkëshortin e saj. /tvklan.al
