Një 67 vjeçar italian ka falenderuar publikisht 4 shqiptarët që i shpëtuan jetën teksa makina e tij u përmbyt në rrugë. “Në atë moment, aty pranë kalon një makinë me të cilën udhëtonin 4 shqiptarë. Ata dëgjuan britmat e mia dhe më thanë të hapja derën, por nuk mund të bëja më shumë se aq. Njëri prej tyre bërtiti ‘shkojmë ta shpëtojmë’. Njëri hapi derën e makinës, ndërkohë dikush tjetër më hodhi rripin dhe më tha që ta kapja. Ndërsa dy personat e tjerë mbanin barrierën anësore të rrugës që kishte rënë”, rrëfen Loreno Casini.
Shqiptarët e tërhoqën atë me litar dhe me sukses e nxorrën nga makina. 67-vjeçari kishte thyer një brinjë, por nuk kishte asgjë tjetër serioze.
“Nuk kuptova asgjë në atë moment. Nuk e di as nëse i falenderova. Zjarrfikësit u kthyen mëngjesin e së nesërmes për të nxjerrë makinën nga kanali. Ishte shkatërruar, por kjo nuk ka rëndësi”, shprehet italiani.
Emrat e 4 shqiptarëve heronj nuk i ka treguar, por thotë se gjithçka do të kishte përfunduar në tragjedi po të mos ishte për ta. Ditën kur ndodhi aksidenti i rëndë, 67-vjeçari festonte ditëlindjen e tij. Bashkëshortja e Lorenos, zonja Giovanna i konsideron 4 shqiptarët “engjëj të zbritur nga qielli”.
Lexo te plote: Lajmi ne median italiane
