Greqia ka hyrë në një gjendje gatishmërie pas konfirmimit të katër rasteve me mutacionin e ri të Covid 19. Në të njëjtën kohë, shumë specialistë të sëmundjeve infektive nuk e fshehin shqetësimin e tyre për një rritje të re dhe të shpejtë të numrit të rasteve me Covid, pasi është provuar rritje e lëvizjeve gjatë festave të Krishtlindjes dhe Vitit të Ri.
Ekspertët e sëmundjeve infektive të cilët folën për CNN grek, theksuan se mutacioni i ri i koronavirusit ka rritur transmetimin me 70%, megjithatë ende nuk e dimë se çfarë përhapje ka në komunitet dhe sjelljen e këtij lloji të ri.
Në çdo rast, shkencëtarët rekomandojnë rritjen e gatishmërisë dhe kërkojnë nga qytetarët të marrin të gjitha masat e vetëmbrojtjes dhe vetë-përmbajtjes.
Siç raportoi më herët stacioni televiziv ANT1, në Greqi u zbuluan katër raste të llojit të ri të virusit, gjatë testeve në Institutin për Kërkime Mjekësore dhe Teknologjike të Akademisë së Athinës.
Sipas raportimit të stacionit televiziv, ka shumë të ngjarë që zbulimi i mutacionit e çoi qeverinë në vendimin për një bllokim më të rreptë në ditët e ardhshme, në mënyrë që të ndalonte shpërndarjen në shkallë të gjerë në vend./Opinion.al
