Java e 3-të e Kategorisë Superiore, e cila do të zhvillohet këtë fundjavë, ka nxjerrë në pah problemin më të madh të këtij sezoni, atë të mungesës së stadiumeve të liçensuara për të pritur ndeshje të këtij niveli.
Pas zyrtarizimit të kalendarit të kësaj jave nga FSHF, është krijuar një kaos i vërtetë duke qënë se kalendari parashikon Tiranën dhe Korabin, të cilët luajnë si pritës në të nëjjtin stadium, të zhvillojnë ndeshjet në të njëjtën ditë.
Kalendari i javës së 3tëE shtunë,
17 shtator
Luftëtari – Korabi (Ora 14:00)
Skënderbeu – Laçi (Ora 17:00)
Tirana – Kukësi (Ora 17:00)
E diel, 18 shtator
Vllaznia – Flamurtari (Ora 13:00)
Teuta – Partizani (Ora 16:00)
Shorti i kësaj jave ka përcaktuar që Korabi duhet të luajë në transfertë përballë Luftëtarit, ndërsa Tirana pret në shtëpi Kukësin, por Luftëtari ka kërkuar që 4 javët e para t’i luajë në transfertë në mënyrë që të mos detyrohet të luajë në fushë asnjëanëse derisa të përfundojnë punimet në stadiumin “Gjirokastra”.
Para disa javësh drejtuesit e Luftëtarit konfirmuan se kishin siguruar një kontratë me stadiumin “Adush Muça” të Ballshit për t’i luajtur aty ndeshjet si vendas derisa të bëhej gati stadiumi i tyre, por në javën e parë të kampionatit, edhe pse shorti parashikonte që Luftëtari të priste Partizanin në shtëpi, klubet me miratim të FSHF ranë dakort që ndeshja të luhej në Elbasan duke quajtur Partizanin vendas.
Të njëjtën gjë Luftëtari ka kërkuar edhe për ndeshjen me Korabin, por duke qënë se tashmë ka përplasje në kalendar me Tiranën për stadiumin “Selman Stërmasi”, mbetet për t’u parë çfarë zgjidhje do t’i jepet./Panorama Sport/
