KAS vendosi rinumërimin e votave për kryetar bashkie në Belsh. Rinumërimi është vendosur të kryhet të martën në orën 13:30.
Komisioni i Ankesave dhe Sanksioneve në KQZ, vendosi të pranojë ankimimin e bërë nga përfaqësuesit ligjor të koalicionit “Bashkë Fitojmë”, në lidhje me procesin e numërimit në Belsh. Sipas tyre rreth 60 fletë votimi rezultojnë se janë konsideruar të vlefshme, ndërkohë që shënimet kanë qenë ndryshe nga ato që lejohen nga KQZ. Ata thonë se disa janë shënuar me pikëpyetje, e disa të tjera janë shkarravitur, ndërkohë që pasi janë shpallur të vlefshme i kanë kaluar si vota PS. Po ashtu kanë depozituar dhe një video ku sipas tyre rezultojnë se në kuti ka dy fletë votimi më shumë sesa shkruhet në kuti.
Ndërkohë nga ana e përfaqësuesit ligjor të PS, ankesat e BF për shënimet në fletët e votimit janë të pavend, sepse sipas tyre, edhe pse nuk janë shënuar sipas rregullores së KQZ, nuk mund të quhen të pavlefshme.
“Pavlefshmëritë janë konstatuar vetëm në atë qendër votimi. Nga fletët e konstatuara nga PD, në vlerësimin tonë nuk janë të tilla aspak. Të kufizosh këtë moment dhe ta detyrosh apo t’ia bësh të pavlefshme vullnetin e qytetarit sepse s’ka bërë me X apo me një + sipas referimit nga KQZ, e vlerësojmë totalisht të pavend. Ky është momenti kur qytetari përcjell pushtetin për kryetarin e Bashkisë. Këto tregojnë presion, janë pretendime që nuk korrespondojnë me kërkimin.”, u shpreh përfaqësuesi i PS.
Në përfundim të mbledhjes KAS vendosi rinumërimin e votave për kryetar bashkie në Belsh. Bashkia e Belshit u fitua nga socialisti Arif Tafani me diferencë të ngushtë votash kundrejt kandidatit të “Bashkë Fitojmë” Bedri Qypi./Opinion.al
