Partia Demokratike ka reaguar pas vendimit të Komisioni i Ankimimeve dhe Sanksioneve për të shfuqizuar gjobën prej 75 mijë lekësh ndaj kryebashkiakut, Erion Veliaj, për organizimin e aktiviteteve të ndaluara përpara zgjedhjeve dhe dhënien e certifikatave të pronësisë.
Sekretari i Partisë Demokratike për Çështjet Zgjedhore, Ivi Kaso e ka cilësuar këtë vendim si të paprecedent dhe anti-ligjor.
Sipas tij, KAS bien ndesh me standartin e OSBE për ndarjen e shtetit nga partia, teksa shton se tre anëtarët e KAS cënuan standardet e barazisë së palëve në zgjedhje.
Reagimi
Komisioni i Ankimimeve dhe Sanksioneve (KAS) humbi sot mundësinë për të qenë një strukturë në funksion të garantimit të zgjedhjeve të lira e të ndershme. Sot me një vendimarrje të paprecedent, 3 anëtarët e KAS kanë shkelur rëndë besimin se mbi interesin e partisë në pushtet qëndron ligji dhe vetë rregullat e sanksionuara nga KQZ.
Vendimet antiligjore të 3 anëtarëve të KAS bien ndesh me standartin e OSBE për ndarjen e shtetit nga partia, duke justifikuar përdorimin e funksionit publik nga Erjon Veliaj për interesa të Partisë Socialiste.
Partia Demokratike dënon këtë akt të paligjshëm të 3 anëtarëve të KAS, që cënon rëndë standardet e barazisë së palëve në zgjedhje./ Opinion.al
