Tokat e Divjakës gjithë vitin mbillen me karota. Klima e favorizon rritjen e një ndër perimeve më të kërkuara në treg, të piqet në çdo stinë, ndaj për fermerët kultivimi i saj është i rëndësishëm.
Liza Bashuri dhe bashkëshorti i saj, kanë 50 vjet që mbjell karota. Ajo tregon se nga Divjaka është eksportuar në Poloni dhe në Çeki përpara viteve 90-te.
Ky çift nuk ka emigruar asnjëherë, por nga shitja e karotës ka arritur të plotësojë më së miri çdo nevojë të familjes, që nga ndërtimi i shtëpisë deri tek shkollimi dhe martesat e fëmijëve.
Këtë vit çmimi i karotës ka shkuar në 40 Lekë për kilogram. Për fermerët është çmim nën kosto, por të paktën tregu është i garantuar.
Dhjetori ka prodhim të bollshëm dhe krahu i punës paguhet 2500 Lekë për tetë orë punë.
Tokat ranore dhe klima e ngrohtë e Divjakës prodhojnë të gjitha varietetet e karotave. Kjo zonë eksporton në Ballkan dhe në Evropën Lindore. Momentalisht, në tregun vendas, Tirana zë peshën kryesore të tërheqjes për konsum.
Klan News
