Shtetet e Bashkuara të Amerikës po rimarrin autonominë e udhëtimeve hapësinore për astronautët. Tetë vite pas misionit të fundit të “Space Shuttle”, një raketë Falcon 9 e kompanisë private “Space X” ka dërguar në hapësirë kapsulën e parë që mund të mbajë brenda astronautë.
Lëshimi në hapësirë ndodhi në orën 2:49 në SHBA (ora 8:49 në Shqipëri), ku nëntë motorët Merlin ndriçuan qiellin në bazën hapësinore në Florida. Megjithatë, në këtë fluturim të parë nuk ka pasur astronautë, por një manekin të cilit i janë instaluar sensorë dhe mikrofonë, me qëllim që të kuptohet se çfarë ndodh.
Nëse ky testim do të ketë rezultate pozitive, në udhëtimin tjetër parashikohet që në kapsulë të jenë dy astronautë. Kompania “Space X” është themeluar nga Elon Musk, qëllimi i të cilit është të sigurojë udhëtime në hapësirë jo vetëm për astronautët, por edhe për njerëzit e zakonshëm, ndërsa flet edhe për “kolonizimin” e planetit Mars. Elon Musk theu monopolin e shtetit amerikan në udhëtimet hapësinore, ndërsa po punon që raketat e lëshuara të mos shkatërrohen, por të përdoren sërish./Opinion.al
