Karola Rakete, kapitenia e anijes me emigrantë që ankoroi pa leje në portin e Lampeduzës ka paditur zëvendës kryeministrin e Italisë, Mateo Salvini.
Kapitenia e akuzon numrin dy të qeverisë italiane dhe njëherësh ministrin e Brendshëm për shpifje.
Më herët Salvini është shprehur se atë nuk e tremb dot mafia e jo më një vajzë e llastuar gjermane.
“Ajo shkel ligjet, sulmon policinë italiane dhe më pas më padit mua. Por mua nuk më tremb as mafia e jo më një vajzë e pasur dhe e llastuar gjermane”, ka thënë Salvini.
Lajmin për padinë ndaj ministrit të Brenshëm italian e kanë bërë të ditur ditën e premte avokatët e saj, duke intensifikuar betejën mes punonjëses së bamirësisë dhe liderit të së djathtës ekstreme.
31-vjeçarja u dënua me arrest shtëpia, pasi akuzohej se kishte vënë në rrezik jetët e disa policëve italianë dhe se kishte shkelur urdhërin për të mos ankoruar në portin e Lampeduzës, por të gjitha këto akuza u rrëzuan nga Gjykata.
Ministri Salvini, njëkohësisht zëvendës kryeministër i Italisë, e ka quajtur kapitenen një “pirate” dhe “shkelëse të ligjit” dhe ka premtuar se do ta dëbojë nga Italia. Por avokati i Rakete, Alesandro Gamberini ka deklaruar se ndaj numrit dy të qeverisë është depozituar tashmë një padi./ Opinion.al E.Xh.
