Mbrëmjen e djeshme rreth orës 21:00 në Torre Veneri, San Kataldo, provinca e Leçes, Itali është kapur nga Guardia di Finanza një skaf me gjysëm ton drogë që ishte nisur nga Shqipëria. Operacioni u krye kur deti ishte 7 ballë. Trafikanti ka provuar të çajë rrjetën e policisë, por ka dështuar.
Në bordin e motoskafit të bllokuar, i cili është i gjatë rreth 5.5 metra, Guardia di Finanza sekuestroi rreth 510 kg marijuanë.
Autoritetet arrestuan shtetasin shqiptar që drejtonte mjetin lundrues, A.M. 29 vjeç.
Hetimet vijojnë për identifikimin dhe arrestimin e personave të tjerë të përfshirë në këtë trafik, bëri të ditur policia shqiptare e cila tha se mori pjesë në operacion.
