Një 24-vjeçar është vënë në pranga nga policia në kuadër të të operacionit policor të koduar “Taxi”. Policia bën me dije se u bë kapja dhe arrestimi në flagrancë i shtetasit Klodian Toshi, 24 vjeç, banues në Krujë.
I riu për të shmangur kontrollet nga Policia, lëvizte me taksi. Gjatë ndërhyrjes nga oficerët e Policisë, 24-vjeçari po qarkullonte si pasagjer në një mjet taksi, në rrugën “Asim Vokshi”.
Si rezultat i kontrollit fizik Klodian Toshit iu gjetën dhe iu sekuestruan në cilësinë e provës materiale, 900 gramë kokainë dhe një aparat celular.
Po në vijim të këtij operacioni u bë arrestimi në flagrancë i shtetasve:
Adrian Marku, 25 vjeç dhe Mikel Xhetani, të dy banues në Kamzë, pasi gjatë kontrolleve fizike nga shërbimet e Policisë, këtyre shtetasve iu gjetën dhe iu sekuestruan në cilësinë e provës materiale, sasi lënde të dyshuara narkotike të llojit kokainë dhe cannabis sativa, të ndara në doza.
Materialet i kaluan Prokurorisë, për veprime të mëtejshme, për veprën penale “Prodhimi dhe shitja e lëndëve narkotike”.
