Është arrestuar në Abu Dhabi Dritan Gjika, lideri i mafies shqiptare në Ekuador.
Arrestimi i tij u realizua në një operacion të përbashkët nga Njësia Kombëtare e Interpolit në Ekuador, në koordinim me homologun e saj në Abu Dhabi, në Emiratet e Bashkuara Arabe; përmes punës hetimore dhe shkëmbimit të informacionit nga PAcCTO 2.0, më 26 maj 2025.
Ai akuzohet nga Interpoli për trafik droge, pastrim parash dhe krim të organizuar.
Dritan Gjika, një 47-vjeçar shqiptar, mbërriti për herë të parë në Ekuador në vitin 2009 me një vizë të përkohshme vizitor, sipas të dhënave të tij të emigracionit.
Ai u bë një nga njerëzit më të kërkuar të vendit, duke udhëhequr një organizatë kriminale që vepronte në Ekuador dhe Spanjë, duke dërguar sasi të mëdha të substancave të kontrolluara në vendet e Amerikës Qendrore dhe Evropës (Holandë, Belgjikë dhe Spanjë).
Struktura kriminale që ai drejtonte përfshinte një ekip drejtues, personel logjistik dhe bashkëpunëtorë që punonin për kryerjen e këtyre veprave penale, me ndihmën e kompanive legjitime që përdoreshin për pastrimin e parave dhe fshehjen e aktiviteteve tregtare dhe financiare.
Më tej, brenda këtij rrjeti, personeli i portit detar vepronte si informatorë dhe ndihmonte kriminelët të maskonin dhe kontaminonin kontejnerët me substanca të paligjshme, duke përdorur metodën e “grepit të verbër”.
Më 6 shkurt 2024, Dritan Gjika u identifikua nga Prokuroria e Përgjithshme si drejtuesi i operacioneve të mafias shqiptare në Ekuador, pas bastisjes së një shtëpie në një zonë të banuar të Guayaquil.
I arrestuari do t’i dorëzohet organeve kompetente për të vazhduar me procesin e duhur të ekstradimit.
