734 kg lëndë narkotike Cannabis Sativa është kapur sërish në brigjet italiane nga një operacion i përbashkët i Policisë së Shtetit me njësinë ajrore Frontex dhe Guardia di Finanza. Gjatë operacionit janë sekuestruar edhe gomonia rreth 6 metra dhe në bord të saj janë ndaluar dy shtetas shqiptarë me iniciale A.P. 43 vjeç dhe G.S. 39, të cilët po transportonin kanabisin.
Njoftimi i policisë:
Tjetër operacion i përbashkët mes Policisë së Shtetit dhe Policisë Italiane. Sekuestrohet në Torre Chianca – Lecce, një gomone me 734 kg lëndë narkotike Cannabis Sativa.
Policia e Shtetit njofton se, në orët e para të mëngjesit së ditës së sotme njësitë aerodetare të Guardia di Finanza pas sinjalizimeve të dhëna nga Policia e Shtetit kanë arritur të ndalojnë një gomone rreth 6 m, me dy shqiptarë me inicialet A.P. 43 vjeç dhe G.S. 39 vjeç në bord, të cilët transportonin rreth 734 kg Kanabis.
Gomonia kishte dy motorë prej 250 Kuaj-fuqi dhe një tjetër motor rezervë në bord. Të ndihmuar nga njësia ajrore e Frontex me avion dhe helikopter të Guardia di Finanza është bërë i mundur ndalimi dhe sekuestrimi i gomones. Personat në bord janë arrestuar nga autoritetet policore italiane. Policia e Shtetit ka shkëmbyer në kohë informacion me GdF dhe po punohet bashkarisht për hetimin e ngjarjes.
Lidhur me këtë ngjarje ka reaguar edhe deputeti i PD, Flamur Noka duke ngritur pyetje se nga po del kjo sasi droge.
“Sërish 700 kilogramë drogë nga Shqipëria në Itali. Po nga del vallë kjo drogë, se Rama e Tahiri thonë nuk ka më kanabis në vendin tonë. Droga çau detin por pasi u kap në Itali na del aksion i përbashkët . Po nëse është aksion i përbashkët, pse nuk ndalohet asnjëherë droga në Shqipëri, po gjithnjë në Itali. E vetmja meritë e Ramës e Tahirit është që kur droga kapet në brigjet fqinjë, këta të dy bëjnë një deklaratë për mediat.”- është shprehur ai.
